शेवटची भेट

आज बहुदा तुझी माझी शेवटची भेट आहे
यापुढे तू कधी मला दिसणार नाहीस
दिसलीस तरी मला ओळखणार नाहीस
ओळखलंस तरी तू हसणार नाहीस
आज तू,
मला अगदी खेटून बाजूलाच बसली आहेस, पण
तुझ्यामाझ्यातले अंतर आता मोजण्यापलीकडे गेलंय
शांत मीही आहे...शांत तुही आहेस
पण मनात वादळ आज कुठे शांत होतंय?
आज आपल्यामध्ये वेळेलाही अस्वस्थ वाटतंय
आकाशही काळ्या ढगांनी दाटतंय
रोज पावसाला घाबरणारी तू,
आज पाऊस पडणार तरी थांबली आहेस
अंधाराला घाबरणारी तू,
आज माझ्याशिवाय कशी घरी जाणार आहेस तू?
आज माझ्याकडे फक्त प्रश्न आहेत
उत्तरं कदाचित तुझ्याकडेही नाहीत
आज जीवन एका विचित्र वळणावर आहे
काल दूर असूनही, तू जवळ होतीस
आज समोर असूनही, तू दूर आहेस
आता पर्यंत कसे बसे झेलले होते अश्रूंना
पण आता जास्त वेळ शक्य होणार नाही
भिजण्याची वाट पाहतोय
कदाचित तेव्हातरी मनापासून रडता येईल
तू घरी जायला निघशील आता, मला सोडून
डोळ्यातलं पाणी टिपत मी आज फक्त बघत राहीन
तुही आज माझ्याशी काही बोलू नकोस
स्वतःला सांभाळण मला जमत असलं तरी
तुझे डोळे पुसत, तुला समजावण मला नाही जमणार
तुला विसरणं मला कधी शक्य होणार नाही
खरंच, पण..................
आज बहुदा तुझी माझी शेवटची भेट आहे ............
आज बहुदा तुझी माझी शेवटची भेट आहे ............