ती कायमची गेली...

का न जाणो नजरा फिरवून आज ती गेली
कालच्या क्षणांना एक प्रश्न देऊन आज ती गेली
न बघता मागे फक्त पुढे चालत आज ती गेली
का न जाणो पण आज ती कायमची दूर गेली

हाकेच्या अंतरावर हाकेपासून दूर ती गेली
डोळ्याच्या क्षितिजांवर पाऊस देऊन ती गेली
क्षण सोबतीचे स्वप्नात हलकेच ठेवून ती गेली
जाता जाता एक जखम हृदयावर देऊन ती गेली

श्वासांत असणारी कायमची सवय होऊन ती गेली
हृदयात असणारी सारी स्पंदनं थांबवून ती गेली
जुन्या प्रश्नांना नवीन उत्तर शोधण्यास ती गेली
जुन्या उत्तरांना एक नवीन शांतता देऊन ती गेली

जन्माची अंतरं क्षणात ओलांडून आज ती गेली
अंतरात किती जन्म न जाणो सोडूनी आज ती गेली
शेवटचा शब्द दाबून ओठातच आज ती गेली
का न जाणो पण आज ती कायमचीच गेली .......